Մի խումբ քաղաքացիներ այսօր կրկին բողոքի ակցիա արեցին Երևանի քաղաքապետարանի դիմաց՝ Երևանում իրականացվող աղբահանության, իրենց բնորոշմամբ, վատ աշխատանքների համար: Այս անգամ ակցիայի մասնակիցները Երևանի քաղաքապետ Հայկ Մարությանի նկարով աղբով փուչիկներ էին բերել քաղաքապետարանի դիմաց:
«Ահա աղբով փուչիկները քաղաքապետի նկարով բարձրանում են քաղաքապետի աշխատասենյակի մոտ»,-ակցիայի ժամանակ նշեց Երևանի ավագանու նախկին անդամ Սոնա Աղեկյանը:
Ակցիայի ընթացքում ոստիկանները բերման ենթարկեցին կազմակերիպչներից Սոնա Աղեկյանին և
Սամվել Մովսիսյանին՝ ոստիկանության օրինական պահանջը չկատարելու համար, ինչից մեկ ժամ հետո նրանց բաց թողեցին ոստիկանության կենտրոնական բաժնից:
Ավագանու նախկին անդամը ֆեյսբուքյան ուղիղ եթերի ժամանակ հիշել է 2018-ի փետրվարի իրենց ակցիան՝ կոյուղաջրերի վերաբերյալ:
«Անգամ հանրապետականների ոհմակն այն ժամանակ չմտածեց, որ կարելի է որևէ մեկին բերման ենթարկել»,-ասել է Սոնա Աղեկյանը:
Հիշեցնենք, որ օրերս նրանք բողոքի ակցիա էին իրականացրել՝ քաղաքապետարանի դիմաց աղբ նետելով, ինչի հետևանքով իրավապահ մարմինները նրանց բերման էին ենթարկել: Նրանք լրագրողների հետ զրույցում նշել էին, որ նմանատիպ ակցիաները լինելու են շարունակական:
https://www.facebook.com/Sona80.aghekyan/videos/2442119582741951/?t=147
