Բարձրագույն դատական խորհրդի նախագահ Գագիկ Հարությունյանը օրերս հրաժարականի դիմում է ներկայացրել, որը և բավարարվել է ՀՀ նախագահի կողմից։
Կոտայքի մարզի Գեղաշեն գյուղում ծնված Հարությունյան Գագիկը Հայաստանում տարբեր պաշտոններ է զբաղեցրել՝ ՀՀ Գերագույն խորհրդի նախագահի տեղակալից, մինչեւ վարչապետի պարտականությունները կատարող, իսկ 1996 թվականից զբաղեցրել է Սահմանադրական դատարանի նախագահի պաշտոնը։ 2018 թվականի մարտի հինգին ընտրվել է ԲԴԽ նախագահ։
Գագիկ Հարությունյանը հայաստանյան քաղաքական դաշտի, իշխանական էլիտայի կարկառուն դեմքերից է եղել։ Նրան հաջողվել է հավատարմորեն ծառայել բոլոր իշխանություններին, կատարել նրանց հրահանգները։ Գագիկ Հարությունյանը լինելով իշխանական բուրգին կարողացել է պաշտոններով ապահովել նաեւ իր ազգականներին։
Եվ այսպես․ Գագիկ Հարությունյանի Գագիկ Հարությունյանի եղբայրը՝ Արզուման Հարությունյանը ԱԱԾ տնօրենի առաջին տեղակալն է: Արզումանյանը արդեն իսկ ազատվել է զբաղեցրած պաշտոնից։
Արզուման Հարությունյանի որդին` Հայկ Հարությունյանը, ով նախկին վարչապետ Կարեն Կարապետյանի փեսան է, զբաղեցնում էր էներգետիկայի փոխնախարարի պաշտոնը։
Գագիկ Հարությունյանի քույրը՝ Շամամ Հարությունյանը, ՀՀ աշխատանքի և սոցիալական հարցերի նախարարի տեղակալ է: Մինչ այդ նա նույն նախարարության «Զբաղվածության պետական ծառայություն» գործակալության պետն էր:
Գագիկ Հարությունյանի դուստրը՝ Արմինե Հարությունյանը թիվ 8 պոլիկլինիկայի գլխավոր բժիշկն է, սկեսրայրին պատկանող «Բեգլարյան բժշկական կենտրոնում» աշխատում է որպես բաժանմունքի վարիչ:
Գագիկ Հարությունյանի որդին՝ Արտակ Հարությունյանը ՀՀ գլխավոր դատախազության կոռուպցիոն և կազմակերպված հանցագործությունների գործերով վարչության պետն է:
Նախկինում նա զբաղեցնում էր ՀՀ ազգային անվտանգության մարմիններում կիբերհանցագործությունների գործերով վարչության պետի տեղակալի պաշտոնը:
Գագիկ Հարությունյանի մյուս որդին՝ Էդուարդ Հարությունյանն էլ ԵՊՀ-ում է մի քանի պաշտոն զբաղեցնում, Միջազգային համագործակցության վարչության պետի տեղակալ , բաժնի վարիչ, ռեկտորի աշխատակազմի ղեկավարի տեղակալ:
Հարությունյանը խնամիական կապեր ունի առաջին նախագահ Լեւոն Տեր-Պետրոսյանի եղբոր հետ, բժիշկ Կամո Տեր-Պետրոսյանի դուստրը Հարությունյանի հարսն է:
Երկարամյա պաշտոնավարման ընթացքում Գագիկ Հարությունյանին հաջողվել է ոչ միայն ազգականներին պաշտոններով ապահովել, այլ նաեւ պատկառելի ունեցվածք դիզել։
Բարձրաստիճան պաշտոնատար անձանց էթիկայի հանձնաժողով ներկայացրած Հարությունյանի նախորդ տարվա հայտարարագրից տեղեկանում ենք, որ Բ ԴԽ նախագահի պաշտոնը ստանձնելու օրվա դրությամբ Հարությունյանն ունի 4,083,358.00 ՀՀ դրամ, կամ՝ 9 միլիոն դոլար, 5,900.00 դոլար եւ 2,300.00 եվրո։
Հարությունյանը հայտարագրել է մեկ բնակարան, մեկ առանձնատուն, հողամաս եւ հասարակական նշանակության շինություն։
Կիսվեք ընկերների հետ
