Կարծում ենք, փափուկ ու անուշաբույր բուլկիներ բոլորն են սիրում։ Համեղ ու ախորժելի թխվածքը սուրճի կամ թեյի հետ լավագույն հյուրասիրությունն է։ Սակայն շատերին է հայտնի, որ խմորիչով խմորը բավականին կամակոր է, և պետք է պատրաստել միայն փորձված բաղադրատոմսով։
Անհրաժեշտ է․
- 600գ ալյուր
- 20գ խմորիչ
- 300գ գոլ կաթ
- 4ճ․գ․ շաքարավազ
- 1ճ․գ․ ձեթ
- 2 ձու
- 50գ կարագ
- վանիլին
- աղ
Պատրաստման եղանակ․
Պատրաստենք խմորիչային զանգվածը։ Գոլ կաթին ավելացնել խմորիչը և 200գ ալյուր։ Զգուշորեն խառնել և թողնել տաք տեղում։ Մոտ 15 րոպե անց ավելացնել 1 ձու և 1 ձվի սպիտակուց։ Խառնել։
Այժմ լցնել վանիլինը, աղն ու ձեթը։ Սկսել հունցել՝ քիչ-քիչ ավելացնելով մնացած ալյուրը։ Մի քանի րոպե անց ավելացնել հալացրած կարագը և շարունակել հունցել՝ մինչ խմորը կներծծի ամբողջ կարագը։
Ձեռքերին ձեթ քսել և խմորից մեծ գնդիկ ձևավորել։ Ծածկել տոպրակով և թողնել տաք տեղում՝ 1 ժամ։
Այժմ կարող եք բուլկիներ ձևավորել և թխել։ Չմոռանաք ջեռոցն ուղարկելուց առաջ դեղնուց քսել բուլկիներին, իսկ տապակն էլ ծածկել յուղաթղթով։
ԹԽել նախապես տաքացրած ջեռոցում՝ 180 ջերմաստիճանի ներքո, մոտ 30 րոպե։
Բարի ախորժակ։
