Առաջարկում ենք պատրաստել կարտոֆիլով կարկանդակներ՝ շատ փափուկ խմորով և համեղ միջուկով։ Կարող եք և տապակել ձեթով տապակի մեջ, և թխել ջեռոցում։
Անհրաժեշտ բաղադրիչներ․
- ալյուր՝ 370գ
- կեֆիր կամ մածուն՝ 250մլ
- ձեթ՝ 4ճ․գ․ + 4ճ․գ․ տապակելու համար
- սոդա՝ 1/2թ․գ․
- աղ՝ 1/2թ․գ․
- շաքարավազ՝ 1թ․գ․
միջուկի համար․
- կարտոֆիլ՝ 7 հատ միջին չափի
- ձու՝ 1 հատ
- կարագ՝ 50գ
- աղ՝ ըստ ճաշակի
Պատրաստման եղանակ․
Սկզբում անհրաժեշտ է եփել կարտոֆիլը։ Դրա համար եռացնել ջուրը, աղ ավելացնել և մեջը դնել մաքրած կարտոֆիլը։ Եփել 30-40 րոպե։ Իսկ մինչ այդ պատրաստել խմորը։
Աղն ու շաքարավազը խառնել։
Լցնել կեֆիրը և խառնել։
Ավելացնել սոդան, խառնել ևս մի անգամ։
Լցնել 3ճ․գ․ ձեթ և մաս-մաս ավելացնել մաղած ալյուրը։ Խմորը սկզբում կլինի կպչուն։
Ավելացնել ևս 1 ճ․գ․ ձեթ և խմոր հունցել։ Պետք է լավ հունցել, կարող եք հարիչ օգտագործել։
Խմորը ստացվում է շատ փափուկ, էլաստիկ, հունցելուց հետո այլևս չի կպչում ձեռքերին։
Վերադառնալ միջուկին։ Կարտոֆիլը ջրքամել, ավելացնել ձուն, կարագը և համեմել աղով։
Լավ տրորել, որ միասեռ զանգված ստացվի։
Ձևավորել կարկանդակները։ Խմորը բաժանել հավասար մասերի, ստացվում է 12-14 հատ՝ միջին չափի կարկանդակ։
Ձևավորել կարկանդակներ։
Սկզբում խմորին գնդիկի ձև տալ, այնուհետև գրտնակել ալյուրոտ սեղանի վրա։ Պետք չէ շատ բարակացնել։
Մեջտեղի հատվածում միջուկ դնել։ Եզրերն ամրացնել կենտրոնական հատվածում։ Կարկանդակը շուռ տալ՝ կարով դեպի ներքև։ Զգուշորեն գրտնակել և ծակծկել պատառաքաղով։
Տաքացնել թավան՝ մեջը ձեթ ավելացնելով։ Տապակել կարկանդակները երկու կողմից։ Շատ արագ են պատրաստ լինում, յուրաքանչյուր կողմից տապակվում է 1-2 րոպե։
Փափուկ և համեղ կարկանդակները պատրաստ են, բարի ախորժակ։
Նյութը հրապարակման պատրաստեց havesovinfon