Արցախում օր օրի իրավիճակը թեժանում է։ Եւ պատճառը ոչ թե երկրագունդը պատուհասած Կորոնավիրուսն է, այլ մարտի 31-ին կայանալիք խորհրդարանական եւ նախագահական ընտրությունները։ Հիշեցնենք, որ Արցախի նախագահի պաշտոնին հավակնում է 14 թեկնածու՝ աննախադեպ քանակ։ Մրցապայքարը թեժ է։ Կան ֆավորիտներ, կան՝ ետնապահներ։ Ընդ որում, կիրակի օրը լրանում էր թեկնածությունները հանելու ժամկետը, սակայն ոչ մի թեկնածու, անգամ նրանք, ովքեր քարոզարշավ չեն անում, չհանեցին թեկնածությունները։ Թեկնածուների լեքսիկոնն օր օրի ավելի է կոշտանում, միմյանց ուղղված փոխհրաձգությունը դառնում է ավելի սուր։ Արցախում տագնապած են, որ ընտրությունների անմիջապես նախօրեին կամ քվեարկությունից հետո իրավիճակը դուրս չգա կառավարումից։ Իսկ ռազմականացված այս տեղանքում, որտեղ շատ են կռված տղերքն ու արմատական տրամադրությունները նման վտանգ կա։ Մենք զրուցել ենք զինվորականության կարկառուն ներկայացուցիչ, Արցախի հերոս Վիտալի Բալասանյանի հետ, ով այս ընտրությունների ֆավորիտներից է համարվում։
